Радыус-вектар

Ра́дыус-ве́ктар пункта ў прасторы — гэта вектар, які злучае пачатак каардынат з гэтым пунктам і накіраваны да яго.

Каардынаты пункта з'яўляюцца каардынатамі яго радыус-вектара. Такім чынам, радыус-вектар адназначна ідэнтыфікуе пункт у прасторы. Абсалютная велічыня радыус-вектара складае адлегласць пункта ад пачатку каардынат.

У трохмернай простакутнай дэкартавай сістэме каардынат радыус-вектар можна запісаць наступным чынам:

$𝐫=x𝐢+y𝐣+z𝐤$

дзе x, y, z — каардынаты (абсцыса, ардыната і апліката) пункта, а $𝐢$, $𝐣$ і $𝐤$ — орты адпаведных каардынатных васей.

Таксама радыус-вектар можна запісаць як

$𝐫=r\hat{r}$

Тут r — велічыня радыус-вектара, а $\hat{r}$ — яго орт. Такі запіс адметны тым, што ён прадстаўляе вектар як здабытак двух множнікаў, першы з якіх характарызуе яго велічыню, а другі — напрамак.